بسم الله الرحمن الرحيم

اخيرا بقيت ادمن وبعد طول انتظار لانى عارفة انكوا مستنيين الحدث ده من زمااااااااااااااان

المهم بما ان انا اصغر عضو فى المدونة فقررت ان يبقى عليا الجزء الترفيهى وجبت لعبة اسمها (النص عليك والباقى على اللى بعديك) واللعبة عبارة عن واحد هيقول نص كلمه واللى يدخل بعده يقول النص التانى بحيث انها تدينا كلمة ليها معنى وكمان اللى يدخل يقول نص جديد

وانا هبدا

وه

هبه وهب

تعالوا نفرفش خمسة ونزود معلوماتنا

بسم الله الرحمن الرحيم

بحب اهني نفسي على اول بوست وانتظروا مفاجئاتي

موضوعنا تعالوا نفرفش خمسة بشكل مباح

كل الفكرة هي مسابقة ثقافية ولها عدة مميزات

اولا هتزود اشتراكاتنا واهتمامنا بالمدونة
ثانيا هتزود الجانب الثقافي عندنا
ثالثا هنفرفش ونهزر

المسابقة عامة تقدروا تقولوا ثقافية وسياسية ودينية واجتماعية ... الخ

انا هبدأ بسؤال واول اجابة صحيحة هو اللى يكون عليه الدور ...
وكل واحد يسأل لازم يتابع المدونة كل شوية عشان يحدد الجواب الصحيح واللي المفروض يسأل بعده

سؤالي ما هي المحافظات التي تجاور محافظة المنوفية (سهل جدا)

اول واحد هيجاوب صح هقوله انت صح واسال السؤال التاني

وما زالت اعمال الانشاء متواصله

تم بحمد الله وتوفيقه استكمال البنيه التحتيه لمبني عم الحاج علي

بعد جهد استمر لاكثر من اسبوعين

ونتوجه بالشكر للمعلم الكبير عبد الرحمن

كبير المقاولين العرب

نرجو ان تدعوا لنا بالتوفيق

الراجل ده بيقول كلام زى الفل

الراجل ده بيقول كلام زى الفل

مضيفة طيارة بتسأل راكب ... تحب انزل لك عشاء كامل ؟؟؟؟ رد عليها : ليه هو كامل

مش حيتعشى!!!

***

واحد بيقول لصاحبه تيجى نركب اتوبيس؟؟ قال له : يا عم لأ ، احنا نجرى جنب

الاتوبيس ونوفر النص جنيه .... فرد وقال له طب منجرى جنب تاكسى ونوفّر خمسة

جنيه

***

واحد حانوتي ربنا فتحها عليه و فتح محل فكهاني..كل يوم في المحل يقعد ينادي :المووووووز علينا حق

***

اتنين سكرانين ماشيين...فواحد قال للتاني:لما أموت ابقى اشرب لي الكاس

بتاعي ....فصاحبنا مات ، وبعد كام يوم التاني راح البار وطلب كاسين... قاله:

ايوه بس انت لوحدك.... فحكى له على الموضوع .....وبقى كل يوم يشرب

كاسين...لحد ما فى يوم طلب كاس واحد ........الراجل قالوه اشمعنى...قاله:

اصل انا بطلت اشرب

***

واحد واقف أمام محل عصير ومعهوش غير 25قرش قال اشرب عصير ولا اركب الأوتوبيس لو ركبت الأوتوبيس يا هقف يا هقعد، لو وقفت مش مشكله لو قعدت هقعد جنب راجل أو ست، لو, راجل مش مشكله لوست يا هتبقي حلوه أو وحشه، لو وحشه مش مشكله لو حلوه هطلبها للجواز، لو رفضت مش مشكله لو وافقت هدفع لها مهر وشبكه وهتخلف عيال ياخدو فلوسي ويطلعوا عيني، وعلي إيه مشرب عصير أحسن.

***

حشاش بيقول لصاحبه

انا حلمت امبارح أننا بقينا فنانين .. أنت فنان تشكيلي ..... وأنا فنان أشكيلك

***


أحمد وهب

يوميات طالب طب

كائن نصف حي مخنوق يوميااا مطحون دراسيااا مقهور منهجيا محروم ترفيهيا م كتر الضغط

1. (عليه اصبح بالفطره انطوائيا (يا رب استر

وسـع ياجدع .. جبتلكم اجتماع اليوم للمحضرش والى حضر

الســلامـ عليـكم ورحـمة الله
طـبتمـ وطـاب ممشـاكم وتبوئـمـ من الجنـة منزلـاـ

اسـعدتونـا وشـرفتونـا بتـواجدكم الليـلـة عندنـا

اسأل الله ان يديـم عليـنا هذة النهمـة ويحفظهـا من الزوال

بداية اشـكر من حضـر اليـوم واتمنـى ممن لم يحـضر يوضح سبب عدم مجيئة او على الاقل يعتذر قبل الاجتماع

ثانيا سأنقل لكم ماحدث اليـوم فى الاجتمـاع
وفى انتظار تعليقكم
اولا زيارة جدكم الحاج ابو الفتوح الجمعة الجاية بعد العشاء
ثانيا .. الاجتماع القادم عن انس بأذن الله
ثالثا .. الصندوق .. فى اقتراح ان الاشتراك يزيد
رابعا .. النت كما هو والدون لود واليوتيوب زى ماتفقنا يتوقف للساعة 12 صباحا
خامسا.. السطح . نأجلة
سادسا.. الاهتمام بالمداونة اكثر ووض موضوعات حيوية والجميع يشارك بالبوستات والكومنتات على المواضيع ( ن الاخر محدش يعدى يوم الا لما يدخل المدونة )
سابعا رحاب هدينا دورة اسعافات اولية ومعها احمد ابتدأ من الاسبوع الجاى ( كل اسبوع ربع ساعة )
ثامنا .. اتفقا نخرج نروح شبين .. اية رايكم ؟؟وفى اقتراح تانى نتجمع يوم الخميس هيكون يوم فرى ونتفرج عالفيلم او نلعب كوتشينة او انى ثنج (


منتظـرة تعليقكم ..
تحيـاتى ..

نسيبة

في ايه يا عيلة

السلام عليكم

أنا شايف ان الناس بدأت تكسل تاني بعد ما كنا ماشيين زي الفل

في ايه يا عيلة

منتظرين اقتراحاتكم ومنتظرين نسيبة وهبة ورحاب وأحمد

أظن يا جماعة اني مش هاجي اخبط على كل واحد فيكم علشان اقوله تعالى اعملك طريقة الأدمن في المدونة

أتمنى من الجميع التواصل مرة أخرى

إدارة المدونة

ايه يا جماعه

ايه يا جماعه

متسمعونا الصلاه علي النبي

الاجتماع

بانتظاركم في الاجتماع اليوم

وهنناقش موضوعات كتيرة ربنا يسهل وناخد عليها موافقة


إلى اللقاء

بيت العيلة

السلام عليكم ورحمة الله

بيت العيلة
( اخباركم ايه )


بصراحة ياجماعة احنا كل واحد قافل على نفسه بيته ولا يعرف عن التانى حاجة
وبنتفاجئ ديما بالاخبار او بنعرفها من برة
زى مثلا سفر عمو محمد عرفتة من حد برة
وغيرها من المواقف طبعا

ففكرت نخصص البوست ده لأخبار العائلة وكل واحد يكتب فيه اخر اخباره سواء فى العمل او الكلية او المدرسة
سواء فى بيته او فى عائلة والدته
نكتب مواقف معينة حصلت معانا واستفدنا منها ايه
حد عندة طلب .. او مصلحة ممكن نقضيها ليه
حد عندى مشكلة ما يفضض هنا
حد مريض او زهقان او طهقان او فرحان يفرحنا معاة

نحاول نلاقى حل للمشكلة دى
كنوع من زيادة القرب والود
ها اية رايكم؟؟
منتظرة تعليقكم
:::
::
:
تحياتى


نُسيبة

تيتة الحاجه .... جمال و قوة

مازالت جدتي أو ( تيتة الحاجه) ذات السبعة والثمانين ربيعا تبهرني في كل شيء حتى الآن،
بقايا جمال قديم و ذاكرة قوية وذهن حاضر وروح متقدة نفتقدها نحن الشباب في أيامنا هذه وفوق ذلك كله قدر ملاحظ من الإعجاب بالنفس والزهو يصل لكل من يتعامل معها من أول مرة فكيف بحفيدها ؟

في كل مرة تحكي لي القصص المختلفة دون كلل ولا ملل وفي كل مرة تعتقد أنها تحكيها لأول مرة على الرغم من تكرارها كثيرا ولا أقدر على البوح بأي شيء وإلا كان لي الويل والثبور وعظائم الأمور.

تجلس في مجلس العائلة فتذكرني بالحاجة فاطمة تعلبة في الوتد أو بماري منيب في أي فيلم من أفلام الأبيض والأسود أو حتى كالأميرات التركيات المشتهرات بقوة النفوذ ووفرة الإعجاب بالنفس.

تأمر فنطيع ...

وتنهى فننتهي

والكل لها تبع

وما نفعل ذلك إلا لنتقي النار ولو بنصف همسة

،إن غضبت فنظرتها وعيد وكلامها تهديد ،وإن فرحت فابتسامتها حلوة وتعليقاتها فيها حضور وقوة.كل ذلك وأكثر جعلني أتوقع أن يكون كل جيلها هكذا فما أدراني بغير ذلك وقد رحلوا كلهم ولم يبق إلا هي ( أمد الله في عمرها ) بل لم أجرؤ يوما على أن أقول ذلك وإلا كانت الطامة

عجيب ذلك الجيل من الناس، فلديه من الروح المتفائلة مع شظف العيش حينها ما يثير الاستغراب والدهشة، دخل بسيط ومعيشة رقيقة الحال صاحبها في ذات الوقت ضعف الإمكانيات العامة ورغم ذلك كله تجد الصبر والتحمل والرضا بشكل غريب، بعكس حالنا نحن الشباب هذه الأيام،


مازلت أتذكر كيف كانت تحكي لي جدتي أنها ولدت عمي الكبير في ( الغيط ) دون ( داية ) ولا دكتورة أطفال، فقط كل ما تقوله أن وقت الولادة قد حان وهي في عملها مع أهلها ولا وقت للذهاب لأي مكان .... بكل بساطة وضعته ثم لفته في لفافة من قماش ووضعته بجانبها ثم أكملت عملها حتى نهاية اليوم

مازالت تتذكر ذلك البيت الكبير الذي كان يضم العائلة الكبيرة ... جدي الأكبر ( حماها ) رحمه الله الذي كان يمتلك عبدا مملوكا لا يقدر على شيء... كان قد كبر سنه فهو كلٌ على مولاه... لكن جدي أحسن إليه في أواخر عمره حتى توفى رحمه الله ، أظنه كان الوحيد من أهل البلدة الذي يملك عبدا ... البلدة كلها تأتمر بأمره وتنتهي بنهيه ..

كيف كانت المعيشة في بيت يضم حوالي 40 فردا والكل يعمل في نظام محكم ولا يجرؤ على عصيان الأوامر ،

تحكي كيف كان جدي ( زوجها ) رحمه الله قوي الشخصية وافر الذكاء ... لا يمر أحد من أمام داره إلا وجب عليه النزول من على حماره وخلع حذاءه والمرور حافيا حتى يبتعد.

رائعة تلك العائلة التي تبعث على الفخر بحق ...

دائما ما تسخر مني أنا وأبناء عمومتي... من طريقة أكلنا وشربنا وحتى ملابسنا التي تثير استغرابها على حد وصفها ثم تقول... الله يرحم أيام زمان كان كل حاجه فيها بركة كما تكرر على أسماعنا باستمرار أنه يجب علينا الاهتمام بالأكل أكثر من ذلك فنحن في نظرها مفرطون وكسالى وأن (الشتا للرجالة) على حد قولها كما أن الاستحمام بالماء البارد في الشتاء سبب كافي لجمال البشرة حتى مع الكبر، كل شيء تحاول أن تتكلم فيه حتى العناية بالبشرة والشعر والغزل والمعاكسات كانت لها معها (حوارات) بجانب تعليقها المستمر على غلاء المعيشة وسوء الأوضاع.

لها من الاهتمامات السياسية ما يثيرني حقيقة كثيرا بل ويصل الحال أحيانا لأن تقضي الليل كله باكية على حال فلسطين أو تمضي النهار بأكمله تتكلم في قضية الانتخابات الأمريكية الأخيرة، كما لابد من أن تدلي بدلوها في القضايا الداخلية أيضا فتحلل أزمة العيش وتبحث في أصل مشكلة التموين بجانب متابعتها المستمرة لجلسات مجلس الشعب على الرغم من أنها تطالها أيدي الرقابة بالطبع.

ذات مرة ( طب) البوليس عليهم في البيت ... لا يوجد إلا أباها فقط، وأخوها كان بالخارج ... هو من كان مطلوبا بالتحديد لحيازته قطعة سلاح فقد كان (شيخا للغفر) ... دخل العسكر بيتهم ... فتشوه وهي تضع القطعة تحتها وهي على السرير بجانب أباها المريض ... طلبوا منها أن تقوم فرفضت وأصرت حتى خرجوا ... وكأن شيئا لم يكن.... هكذا تحكي هي بكل بساطة فالأمر من وجهة نظرها لا يتعدى بضع كلمات وحسب...

كم كانت قوية تلك المرأة بالفعل . وهي تحكي لي هذه المواقف يدخل أبي عليها أو أي ابن من ابنائها ثم يخرج فتدعو لهم دائما بالدعاء المعتاد ( الله يوقف لك ولاد الحلال ويكفيك شر الطريق )


دمتم بود

أنس وهب

رحله الا ما وراء الشمس

ازيكم يا جماعه
احيانا الواحد بيعمل حاجات
وميحسش بطعمها
الا بعد فتره

وهو دا اللي حصل معايا


من كام شهر كده طقت في دماغي انا واصحابي اننا نعمل حاجه جديده
فقررنا اننا نروح رحله وراء الشمس


كانت جميله بجد
بس الاعجب اني بحس بجمالها دلوقتي اكتر من وقت الرحله

لما فتحت الصور من شويه كنت بحس بشعور رائع



مش عايز اطول عليكم

بس حابب اوريكم المكان اللي كنت فيه

واظن انكم ممكن تستنتجوا انا كنت فين



اسيبكم مع بعض الصور اللي اخدتها هناك

اتمنى تستمتعوا بيها


دمتم بخير


الرفيق محمد

الكل يوسع للحاجة الكبيرة

منورة والله

شيماء

عازمكم على ايس كريم في تركيا

السلام عليكم

الأول يا ولاد أحب أهنيكم إني بقيت أدمن في المدونة

وأنا عارف انكم كلكم فرحانين بالخبر السعيد ده ومستنينه من عشر سنين

ومش عايز اقولكم قد ايه أنس ومحمد اتحايلوا عليا عشان اخش ادمن وربنا يعين

نسألكم الدعاء .. والتبرع والمقاطعة

.. :D

المهم انا بالمناسبة دي عازمكم على ايس كريم في تركيا

اتفضلوا بالهنا والشفا

وده رابط اليوتيوب كمان اللي عايز يبعته لحد

http://www.youtube.com/watch?v=fvUQQF5S4Dg

منتظر تعليقاتكم

... الحاج بلال

فسحه بنها... انطلاقه جديده

ازيكم يا جماعه
وحمد لله علي السلامه


اتمني تكون فسحه حلوه وتكون عجبتكم


انا عن نفسي
انبسطت كتير
مع العلم انها كان ممكن تكون منظمه احسن من كده


بس هي كبدايه جميله


شكرا لكل من شارك


منتظرين رايكم




دمتم بخير


محمد

الجميلة دى بلدنا..

الجميلة دى بلدنا

كفر وهب عروس الدلتا

مزيد من الصور

http://www.20at.com/galleries/29May08/wahb.htm

http://www.20at.com/masr/t7kyk/9214.html



شيماء

وفيها ايه لو بلال عشانا

بلال افندي
في الاول احب احييك
وعايز اقولك

فيها ايه لو عشتنا عندك يوم الخميس الجاي

انا شايف ان الموضوع سهل وبسيط
وبخاصه انك دلوقتي بتشتغل وبتقبض علي قلبك وتكنز
ومش بتصرف حاجه
لانك
من الاخر

لسه لواحدك

فانا شايف ان الموضوع مفيش فيه مشكله
وهي تفك شويه عن قلبك

وتطلع الفكه بس اللي في جيبه
وعلي فكره
احنا قنوعين
يعني مش هتيجي للي تحت البلاطه



ولا ايه رايكم يا اولاد العائله

دمتم بخير

محمد

رجاء

سلام كبير قوي

الحلويات فوق دي للكل وكله ياخد مافيش حد ينكسف


يا جماعة

لو سمحتم اللي يكتب بوست يكتب اسمه تحته

وبرضو لازم نهتم أكتر بالمدونة وندخل نشارك بشكل أكبر كمان


سلام كبير مربع


أنس

الوضع مستقر والدنيا فل الفل

السلام عليكم ورحمة الله

إزيكم يا شباب ويابنات

الحمد لله انا عرفت الطريقة لكن محتاجه شرح برضو علشان تعرفوا تكملوا في المدونة

عموما أنا منتظر البوستات على الميل لحد ما نعرفكم الطريقة إن شاء الله

تحياتي



أنس

اهلا بالجميع

شباب العائله الكرام

تحيه طيبه وبعد

في الاول احب احيكم جميعا

بجد انا انشرح قلبي جدا لما قعدنا امبارح

وحسيت اننا ممكن فعلا نعمل حاجات
وحاجات كبيره كمان

بس المهم
يكون عندنا عزيمه
واخلاص
واصرار علي النجاح
ان شاء الله



السيد عبد الرحمن
السيد يوسف
بما ان حضراتكم محضرتوش الاجتماع امبارح
اليكم ملخص سريع لمسوده الاجتماع
بما اني انتخبت المنسق العام مكان يوسف امبارح

اولا اتفقناعلي الموعد هيكون الخميس القادم الساعه ٨.٣٠ عند بلال
* اقتراح اسم جديد للمدونه علي ان يكون اخر موعد لاستلام الطلبات يوم الاتنين القادم
* هنروح الساحه اليوم السبت الساعه ٨.٤٥
*هنروح فسحه يوم الاتنين القادم لبنها علي ان يكون الاشتراك ٥ جنيه مصري فقط لا غير وموعد الانطلاق الساعه ٥.٤٥ المغرب
*التفكير والاعداد لرحله القاهره بعد اسبوعين او ٣
*فائض اشتراكات النت هتترحل للصندوق
*الموافقه بالاجماع علي اضافه شخص جديد للنت
*بلال هيعشينا المره الجايه ودي اول خطوه لتغيير السمعه عن العائله




دا اللي انا فاكره
لو حد فاكر حاجه تاني يا ريت يتحفنا

دمتم بخير

ترحيب جامد جدا جدا في نجع الوهايبة

إلى أولاد وشباب عائلة وهب الكرام


اهلا بيكم في نجعكم

نجع الوهايبة

أي حد عنده أي استفسار إحنا في الخدمة والمكان مفتوح أربعة وعشرين ساعة

شعارنا


أولاد وهب ... دلوقتي وقتهم